Ober anaoudegezh gant ar vro
Timothée Messager, keginer vejetarian ha buhezour war al louzoù debradus a ginnig an abadenn-se en ul lec'h anavezet mat gantañ : bae Kerlavos.
Abadenn kinniget e brezhoneg penn-da-benn, a bep seurt live a vo, kement an deraouidi hag ar re varrek, an holl ac'hanomp a zesko un dra bennak. Deuit hardizh neuze, n'eus ket ezhomm kaout doan rak ho live.
Da 10e30 : emgav e parklec'h Kerlavos ("Chemin du port clos" war ar gartenn) er c'harter ar Golven e parrez Tregastell. Mont a refomp da vale war an aod evit ober un dastumadeg lastez. Ur chañs abominapl hon eus da vevañ en ul lec'h ken kaer en Tregastell met glac'harus e vez pa 'z eer da bourmen gwelet kement a lastez war vord an hentoù. Tapit seier plastik (reoù solud) ganeoc'h da lakaat hon dastumadeg e-barzh.
Da 12e30 : Deomp da zebriñ e ti Mari-Glaziou (da biknikañ ma karit) en un tu bennak war an aod, hervez al lec'h en em gavfomp e fin an dro-vale deus ar beure. Fiziañs am eus e vo brav an amzer. Kemerit peadra da zebriñ ganeoc'h, evidoc'h hag evit ar re all ma fell deoc'h rannañ un dartezenn pe ur wastell bennaket.
Da 2e30 G-K : Baleadenn war an aod evit komz diwar-benn al louzoù gouez, o madelezhioù, pe reoù a c'heller debriñ. Kemerit seier paper hag ur gontell ma fell deoc'h dastum louzoù.
Da 4e30 G-K : Fin an abadenn.