GUINHADA A LA LENGA
![](https://cibul.s3.amazonaws.com/87dd8b4ffe28460e8daffaf018d19c64.base.image.jpg?__ts=1720020638000&format=webp&width=1920)
Lo collectiu Au-dessus du volcan compta un vintenat d'artistas als univèrses plurals qu'an decidit de « far comun » e d'acompanhar la mutacion de nòstra societat en passant pel revelh de la sensibilitat e la practica de l'art. L'objectiu es de crear de projèctes d'exposicions en investissent los espacis possibles sus tot lo territòri del Cantal e venir en ajuda an’aquela volontat de dinamizar la cultura dins nòstre departament.
Per fargar aquela mòstra, Guinhada a la lenga, a l'Ostal del Telh, cada artista aviá coma « dralha », coma objectiu, de se daissar traversar per la matèria occitana. S'inspirar de la lenga occitana, de la cultura que carreja, o tot simplament se'n servir coma d'un medium artistic coma un autre.
L'Ostal del Telh, coma luòc cultural occitan del Cantal, ensaja d’agulhar la creacion contemporanèa occitana jos totas las formas que pòt prendre. E la creacion plastica es una tematica particularament seguida dins la Sason del Telh, la sason culturala, dempuèi qualques annadas. Effectivament, una lenga es per definicion immateriala, de mal palpar, levat per son escritura que ne balha una matèria carnala, fisica. La creacion d'elements visuals que se restacan a l'occitan es un èrm enquèra tròp pauc furgat. Aquel trabalh artistic es essencial per crear de representacions, un imaginari collectiu, terranha de creacions futuras.
Es aquel borbolh cultural dont s'es apoderat lo collectiu. Sèt de sos artistas (Yannick G, Sosthène.SL, Stella, Bruno Verger, François Vert, Nicolas Gey, Delfe), mai un convidat, Florenç Pòns, que las òbras ressonavan coma una evidéncia dins aquel projècte, respondèron presents per aquel prètzfach creatiu.