📘 La librariá La Tuta d’Òc vos prepausa un darrièr rencontre literari per aquela edicion 2026 del Festival Occitania a l’entorn del libre “La diversitat per subreviure al rescalfament climatic e al refregiment cultural” (La diversité pour survivre au réchauffement climatique et au refroidissement culturel) de David Grosclaude. Se tendrà lo dimècres 28 d’octobre a 18h30 a l’Ostal d’Occitania.
☕ Tot comença per un cafè...
... Lo libre se dobrís sus la question de “l’utilitat” d’una lenga a partir d’una simpla conversacion a l’entorn d’un cafè, al ras de la gara rotièra de Temuco, a Chile. Dàvid fa la coneissença de Juan, sasonnièr en transit cap a Santiago. La discutida s’orienta sus una question tota simpla : “quina lenga parlas quand siás a l’ostal ?” Juan, espantat, respond que son paire e sa maire parlan quechua mas li an pas transmés “perque servís pas a res”. Aquel discors, ausit milanta còps en cò nòstre coma endacòm mai, Dàvid Grosclaude s’i resòlv pas: “se efectivament, se pòdon pas aprendre totas las lengas del monde, sèm obligats per autant de las doblidar, de las escafar de las nòstras memòrias, de las far desaparéisser ?”
