Serada Delpastre amb Monica Burg, François Dumeaux, Miquèla Stenta per la sortida del Diari fòra seria Delpastre
Dimars 21/10 – 19h : Serada DELPASTRE, La cave Poésie 🐑
🎉 En octobre, lo jornal cultural en occitan Lo Diari sortirà un fòra seria dedicat a l'autora lemosina Marcela Delpastre, pel centenari de sa naissença ! Amb la còla de l'IEO OPM - Lo Diari, vos balham rdv lo dimars 21 d'octobre a 19h a la Cave Po' per la presentacion d'aquel numerò especial, en presença de Miquèla Stenta que nos parlarà de l'òbra de Delpastre.
Contunharem la serada amb l'espectacle "D'una lenga l'autra", creacion de poesie, paisatges sonòrs e musica, en francés e en occitan de Lemosin, per Monica Burg e François Dumeaux.
📰 SORTIDA : Lo Diari, fòra seria DELPASTRE
‘Nàvam pas passar a costat. En setembre de 2025, Marcela Delpastre, « la Marcela », la Lemosina, l’universala, auriá ‘gut 100 ans.
Per quela enchaison, Lo Diari fará paréisser un magazine fòra seria de 20 pajas elaborat emb totplen de brave monde, dau Lemosin mai d’alhors. Un pitit cloncon dins una òbra giganta, que vos donará segur enveja de ne’n legir mai.
Lo Diari es un jornal cultural en occitan sus l’actualitat literària, musicala e artistica.
✨Presentacion de l'òbra de Marcela Delpastre per Miquèla Stenta.
Professora de lenga e de cultura occitana pendent d'annadas en Lemosin o a Seta ont demòra ara, Miquèla Stenta es tanben autora de mantunes libres, en occitan coma en francés. Las tematicas son variadas : societat medievala, trobadors, literatura occitana modèrne e tanben de racontes mai personals, coma Eu o Negrelum.
🎤 ESPECTACLE : « D’una lenga l’autra »
20h30 : Espectacle de poesia, paisatges sonòrs e musica / En francés e occitan de Lemosin
Monica Burg e François Dumeaux prepausan un rencontre e una immersion dins l'univèrs de Marcelle Delpastre, poèta e autora màger de la literatura occitana, que se festeja lo centenari en 2025-26.🎶
Femna de letra e paisana, observatritz implicada a la vida del mond, escriu dins La piada :
« E traçarai mon caminòl, trobarai ma rota, ma rota miá, lo camin de ma saba. Marcarai la marca de mon pas . »
Volèm balhar a ausir son amor del mond, de las vacas e de la raia manta, dels camins tant corruts, tant aimats, coma de fons de la mar, son interès pel vivent e lo mòrt, las questions que pausa als legidors coma las que pausa a l'arbre. Per ela, tot es sorsa de poesia. En çò sieu, se trobarà un poèma per tot, per totes, per totas las escasenças, qu'aquel siá l'arbre traversat pel vent, l'animal que nais o que se morís. L'escriu e ne parla sens nostalgia, simpla e terrèstra, universala e cosmica.
Causissèm de l'exprimir dins un lengatge ibrid, en paraulas e en musica e coma l'a fach : quora en francés, quora en occitan o dins un meteis poèma, d'una lenga a l'autra.
De paisatges sonòrs cabussan l'auditòri dins una escota contemplativa : paisatge naturalistas o abstraches, prat-enregistrats o creats en dirècte, entre archius sonòrs, paisatges impressionistas e frequéncias electricas brutas. Son cadun son torn teunhes e luènhs coma de sovenirs, o emplenan l'espaci sonòr, a l'imatge d'una emocion intensa e immediata.
Cants e violon tradicionals son egalament convidats, posant dins las cançons que cantava Marcela Delpastre dins sa familha. Poesia e musica altèrnan e se mesclan. Un libret de traduccions serà disponible al public.
📍 La Cave Poésie, Tolosa
📅 Dimars 21 d’octòbre 19h
Amb l’IEO OPM / Lo Diari
