Dins l'encastre del Festival Occitania, vos prepausam una serada que mèscla la tradicion occitana a mantunes genres, del ròck al jazz en tot passar per la musica electronica, mercés a De La Crau e Dus Au Casau.

De La Crau : « De La Crau es un grope marselhés a las influéncias ròck, folk, punk, crosada amb de poësia moderna. Un univèrs sòbre, a la poténcia contenguda, de melodias traversadas de poësias de mila caras. Sam Karpienia canta un provençal rufe e fòra-sòl estorçut per de riffs en bocla de guitarras electricas. Thomas Lippens martèla la transida a còps de percussions e de fusta ferrejada. Manu Reymond a la contrabassa fa carrincar e nhacar son arquet dins de sequéncias ritmicas sincopadas que menan a l'extasi. »

Dus au Casau : « Dus Au Casau, que son las retrobadas de tres hrairs qui an grandit dens la musica amassa, e qui après caminadas dens mantuns univèrs an decidit de s’amassar a l’entorn de las lors arradics tradicionaus occitanas. Dab la volontat comuna d’arrecaptà’s aquera musica, que trussan quauques potenciomètres d’efèit, qu’apòrtan un chinhau d’armonia jazz, e se balhan aus ritmes de la technò entà transformar en pèças ahuecadas los aires e cants tradicionaus deu lor repertòri. »