Per las Jornadas del Patrimòni aqueste dissabte 18 de setembre a 17 oras, lo Centre Occitan Ròcaguda estrenarà (enfin!) la mòstra consagrada a Nicolaï Greschny e son ligam a l’occitan. Pèire Bertrand nos presentarà aquela mòstra realizada pel CCOA amb l’ajuda de l’associacion Les Amis de Nicolaï Greschny.
L’escasença de descobrir las òbras d’aquel fresquista reconegut, e mai que mai sas frescas en lenga occitana. En efièch, Greschny, nascut en Estònia, traversèt mantun país d’Euròpa fins a son installacion a Marçal, dins Tarn. Foguèt doncas en contacte amb las lengas: estonian, rus, eslavon, alemand, chèc, francés, occitan, e tanben latin e grec qu'aprenguèt pendent sos estudis.
Autor de mai d’un centenat de frescas, subretot dins de glèisas d’Occitània, es naturalament que ne pintra d’unas dins la lenga del país, l’occitan, e aquò dins lo dialècte local. Es d’un autre grand autor de la literatura occitana que ten son escaisnom: Ives Roqueta, admiratiu de son trabalh, escriguèt una rubrica consagrada a l’artista dins La Dépêche : «Greschny, rus d’Occitània».