A l'escasença del Festenal Occitania, l'artista Laurí Privat ven presentar sa mòstra camp.liure, seguida d'un concèrt-balèti prepausat pel duò Arizonà. Una serada occitano-queer de mancar pas a La Gougnotte lo 4 d'octobre tre 18o30.

« Sèm rurals, sèm queer e miladieu sèm aquí ! »
Dins de son campèstre avaironés, Laurí Privat s'ensaja a de creacions divèrsas. Illustracion, fòto, gravadura, vidèo, aitant de biais per parlar de çò que la tòca. Las minoritats i tròban una plaça de las bèlas, tan coma la ruralitat e tot çò que fa la sal de las relacions umanas sus las qualas pausa un agach personal. Entrada dempuèi pauc de temps dins La Galariá, l'espaci virtuala de creacion occitana del Diari, debutèt son activitat artistica via lo compte Instagram

en 2022. Ne faguèt un espaci d'experimentacion que, pichon a pichon, la pòrta sus de camins nòus e passionants.

« Un violon, un acordeon, doas votzes.»
Arizonà es l'alquimia d'un rencontre qu'aima contar d'istòrias d'aquí e d'endacòm mai. Nascut d'una enveja de s'inventar dins lo paisatge de las musicas tradicionalas, lo duo Arizonà planta sas raices dins lo bal e ne tira de melodias que torna adobar liurament. Lo francés e l'occitan s'i crosan per fialar ensemble un repertòri cofle d'energia, una crida irresistibla a la dança. Maëllis Daubercies Abril (Acordeon diatonic e votz) e Milo Darnaud (Violon e votz) s'inspiran de melodias e de cançons del Massís Central per fargar una musica poëtica e cadenciada.